நீ அவரைக் கண்டிருக்கிறாய்

அந்த குருடன் இயேசுவை பார்த்ததில்லை, ஆனால் சிலோவாம் குளத்தை பார்த்திருந்தான்

முந்தைய பாகம்: இப்பொழுது மொண்டு, கொண்டுபோங்கள்

கானா ஊர் கல்யாணத்தில், இயேசு என்கிற கற்சாடியிலிருந்து தண்ணீரை மொண்டதினால் தான், அது சுவை மிகுந்த திராட்சை ரசமாக இருந்தது என்பதை கடந்த தொகுப்பில் பார்த்தோம், இந்த தொகுப்பில், இயேசுவே நம்மை சுத்திகரித்து ஆசிர்வதிக்கும் தண்ணீர் என்பதையும், அதை கர்த்தரே எப்படி செய்து காட்டினார் என்பதையும் பார்ப்போம்.

இயேசு கிறிஸ்துவின் ஊழிய நாட்களில், எருசலேமில் பிறவிக்குருடனாயிருந்த ஒருவன், பிச்சை எடுத்து வாழ்ந்துக் கொண்டிருந்தான், அவனை குறித்து சீஷர்கள் கர்த்தரிடம் இப்படி கேட்டார்கள் - 1.அவர் அப்புறம் போகையில் பிறவிக்குருடனாகிய ஒரு மனுஷனைக் கண்டார். 2.அப்பொழுது அவருடைய சீஷர்கள் அவரை நோக்கி: ரபீ, இவன் குருடனாய்ப் பிறந்தது யார் செய்த பாவம், இவன் செய்த பாவமோ, இவனைப் பெற்றவர்கள் செய்த பாவமோ என்று கேட்டார்கள் - யோவான் 9:1-2

ஒருவேளை அவன் கண் பார்வையுள்ளவனாக இருந்து, அவன் வேறு ஏதாவது குறைவுள்ளவனாக இருந்திருந்தால், அவன் முன்பாக நின்று "இது இவன் செய்த பாவமோ, இவனைப் பெற்றவர்கள் செய்த பாவமோ" என்று கேட்டிருக்க முடியுமா?  ஆனால், இந்த குருடனுக்கோ பதில் சொல்ல முடியாத பரிதாபமான சூழ்நிலை,  அவன் தனக்குள் பாவம் இருப்பதை அறிந்திருந்தான், அதனால் இது போன்ற கேள்விகளுக்கு பதில் சொல்ல முடியாமல், வேதனைப்பட்டது தான் மிச்சம்.

அப்பொழுது இயேசு சொன்ன பதில், அந்த குருடன் தன் வாழ்க்கையிலேயே, முதல் முறையாக கேட்ட ஆருதலான வார்த்தையாக இருந்தது, இது வரை யாருமே அவனிடம் அப்படி பேசினது கிடையாது, தன்னிடம் பாவமில்லை என்று சொன்னவரை காண அவன் இருதயம் தவித்தது, அது மாத்திரம் இல்லாமல், தேவனுடைய கிரியைகள் இவனிடத்தில் வெளிப்படும் பொருட்டு இப்படிப் பிறந்தான், என்று இயேசு சொன்னதினால், அவனுக்குள் ஒரு இனம் புரியதா சந்தோஷமும் உண்டாகியிருந்தது - 3.இயேசு பிரதியுத்தரமாக: அது இவன் செய்த பாவமுமல்ல, இவனைப் பெற்றவர்கள் செய்த பாவமுமல்ல, தேவனுடைய கிரியைகள் இவனிடத்தில் வெளிப்படும்பொருட்டு இப்படிப் பிறந்தான். 4.பகற்காலமிருக்குமட்டும் நான் என்னை அனுப்பினவருடைய கிரியைகளைச் செய்யவேண்டும்; ஒருவனும் கிரியை செய்யக்கூடாத இராக்காலம் வருகிறது. 5.நான் உலகத்திலிருக்கையில் உலகத்திற்கு ஒளியாயிருக்கிறேன் என்றார் - யோவான் 9:3-5

அந்த பிறவிக்குருடனின் பெற்றோர், பலவிதமான மருந்துகளை அவன் கண்களில் தடவி பார்த்திருந்தார்கள், அந்த பிறவிக்குருடனும் பார்வை பெற பல முயற்சிகளை செய்திருந்தான், ஆனால் எல்லாமே ஏமாற்றம் தான், இப்படி மருந்துகளாலும் மனிதர்களாலும் ஏமாற்றப்பட்ட அவனுக்கு, இயேசுவின் கனிவான பேற்றும், அவனுக்காக பரிந்து பேசின வார்த்தைகளும் ஆறுதலை கொடுத்தது, கர்த்தர் தன் கண்களில் தடவின சேற்றை கழுவ சீலோவாம் குளத்தை நோக்கி நடக்க ஆரம்பித்தான் - 6.இவைகளைச் சொல்லி, அவர் தரையிலே துப்பி, உமிழ்நீரினால் சேறுண்டாக்கி, அந்தச் சேற்றைக் குருடனுடைய கண்களின்மேல் பூசி: 7.நீ போய், சீலோவாம் குளத்திலே கழுவு என்றார். சீலோவாம் என்பதற்கு அனுப்பப்பட்டவன் என்று அர்த்தமாம். அப்படியே அவன் போய்க் கழுவி, பார்வையடைந்தவனாய்த் திரும்பிவந்தான். 8.அப்பொழுது அயலகத்தாரும், அவன் குருடனாயிருக்கையில் அவனைக் கண்டிருந்தவர்களும்: இவன் உட்கார்ந்து பிச்சை கேட்டுக்கொண்டிருந்தவனல்லவா என்றார்கள். 9.சிலர்: அவன்தான் என்றார்கள். வேறு சிலர்: அவனுடைய சாயலாயிருக்கிறான் என்றார்கள். அவனோ: நான்தான் அவன் என்றான் - யோவான் 9:6-9

அவன் ஏதற்காக சீலோவாம் குளத்திற்கு சென்றான்? பார்வை அடைவதற்காகவா சென்றான்? இல்லவே இல்லை!. மேலும், இயேசு நீ பார்வையடைய விரும்புகிறாயா என்று கேட்டா, அவன் கண்களின் சேற்றை பூசினார்? அதுவும் இல்லை! பின்பு ஏன் அவன் சீலோவாம் குளத்திற்கு சென்றான்?அவன் தன் கண்களின் மேலிருந்த சேற்றைக் கழுவி அதை சுத்தம் செய்வதற்காக தான் சென்றான். ஏனென்றால், ஒருவன் கண்களின் மேல் மண்சேரு இருக்குமானால், அதை எவ்வளவு தான் கைகளால் துடைத்தாலும் அது சுத்தமாகாது, அது அவன் கண்களுக்குள் சென்று உருத்த ஆரம்பித்து விடும், அதை தண்ணீரினால் கழுவினால் மாத்திரமே சுத்தமாகும், அதனால் தான் அவன் சீலோவாம் குளத்திற்கு சென்றான்.

ஆனால், அவன் தன் கண்களை கழுவின பொழுது யாராலும் நினைத்துக்கூட பார்க்க முடியாத அற்புதமும் நடந்தது, அந்த குருடனின் கண் இமைகளுக்குள்ளாக அழகான கண்கள் உருவாகியிருந்தது - 10.அப்பொழுது அவர்கள் அவனை நோக்கி: உன் கண்கள் எப்படித் திறக்கப்பட்டது என்றார்கள். 11.அவன் பிரதியுத்தரமாக: இயேசு என்னப்பட்ட ஒருவர் சேறுண்டாக்கி, என் கண்களின்மேல் பூசி, நீ போய் சீலோவாம் குளத்திலே கழுவு என்றார். அப்படியே நான் போய்க் கழுவி, பார்வையடைந்தேன் என்றான். 12.அப்பொழுது அவர்கள்: அவர் எங்கே என்றார்கள். அவன்: எனக்குத் தெரியாது என்றான்- யோவான் 9:10-12

நான் கழுவினேன், காண்கிறேன்

நாமும் ஒருவகையில் அந்த குருடனை போல தான் இருக்கிறோம், நம்மால் பரலோகத்தின் தேவனை பார்க்கவும் முடியாது, தேவராஜ்யத்தை சுதந்தரிக்கவும் முடியாது, இதற்கெல்லாம் காரணம் நமக்குள் குடியிருக்கும் பாவமே! தேவஆவியானவர் உணர்த்தினாலோழிய, நம் மேல் இப்படி ஒரு பாவசேறு இருக்கிறது என்பதும் தெரியாது,  இதை தான் இயேசு கிறிஸ்து அந்த குருடனின் வாழ்வில் செய்தார், அவனை உணர்வடைய செய்தார், மேலும், அந்த பாவசேறு சீலோவாம் குளத்தில் கழுவப்பட வேண்டும் என்று ஆலோசனையும் சொன்னார். 

அந்த சீலோவாம் குளம், முதலாவது அவன் கண்களின் மேலிருந்த சேற்றை கழுவி சுத்திகரித்தது, ஆனால் அந்த சுத்திகரிப்பின் பொழுது யாராலும் நினைத்துக்கூட பார்க்க முடியாத ஒரு அற்புதமும் நடந்தது, அந்த குருடனின் கண் இமைகளுக்குள்ளாக அழகான கண்கள் உருவாகியிருந்தது, அது போல தான், நாம் இயேசுவின் இரத்தத்தினால் கழுவப்படும் பொழுது, அது நம்மை சுத்திகரிப்பது மாத்திரம் இல்லாமல், அது நம்மை தேவனுடைய பிள்ளையாகவும் மாற்றி விடுகிறது, நமக்கு நித்திய ஜீவனையும் கொடுக்கிறது. அதனால் தான், அவன் "நான் கழுவினேன், காண்கிறேன்" என்றான் - 13.குருடனாயிருந்த அவனைப் பரிசேயரிடத்திற்குக் கொண்டுபோனார்கள். 14.இயேசு சேறுண்டாக்கி, அவன் கண்களைக் திறந்த நாள் ஓய்வுநாளாயிருந்தது. 15.ஆகையால் பரிசேயரும் அவனை நோக்கி: நீ எப்படிப் பார்வையடைந்தாய் என்று மறுபடியும் கேட்டார்கள். அதற்கு அவன்: அவர் என் கண்களின்மேல் சேற்றைப் பூசினார், நான் கழுவினேன், காண்கிறேன் என்றான் - யோவான் 9:13-15

அவன் "நான் கழுவினேன், காண்கிறேன்" என்று சொன்னது, இந்த உலக காரியங்களை மாமிச கண்களால் பார்ப்பதை அல்ல,  இயேசுவே நம் இரட்சகர் என்பதை கண்டு கொண்டதையே குறிக்கிறது, அந்த இரகசியம் அவனை சும்மாய் இருக்க விடவில்லை, அவனை சாட்சி சொல்ல வைத்தது - 24.ஆதலால் அவர்கள் குருடனாயிருந்த மனுஷனை இரண்டாந்தரம் அழைத்து: நீ தேவனை மகிமைப்படுத்து; இந்த மனுஷன் பாவியென்று நாங்கள் அறிந்திருக்கிறோம் என்றார்கள். 25.அவன் பிரதியுத்தரமாக: அவர் பாவியென்று எனக்குத் தெரியாது; நான் குருடனாயிருந்தேன், இப்பொழுது காண்கிறேன்; இது ஒன்றுதான் எனக்குத் தெரியும் என்றான். 26.அவர்கள் மறுபடியும் அவனை நோக்கி: உனக்கு என்னசெய்தான், உன் கண்களை எப்படித் திறந்தான் என்றார்கள். 27.அவன் பிரதியுத்தரமாக: முன்னமே உங்களுக்குச் சொன்னேன், நீங்கள் கேளாமற்போனீர்கள்; மறுபடியும் கேட்கவேண்டியதென்ன? அவருக்குச் சீஷராக உங்களுக்கும் மனதுண்டோ என்றான். 28.அப்பொழுது அவர்கள் அவனை வைது: நீ அவனுடைய சீஷன், நாங்கள் மோசேயினுடைய சீஷர். 29.மோசேயுடனே தேவன் பேசினாரென்று அறிவோம், இவன் எங்கேயிருந்து வந்தவனென்று அறியோம் என்றார்கள். 30.அதற்கு அந்த மனுஷன்: அவர் என் கண்களைத் திறந்திருந்தும், அவர் எங்கேயிருந்து வந்தவரென்று நீங்கள் அறியாதிருக்கிறது ஆச்சரியமான காரியம். 31.பாவிகளுக்கு தேவன் செவிகொடுக்கிறதில்லையென்று அறிந்திருக்கிறோம்; ஒருவன் தேவபக்தியுள்ளவனாயிருந்து அவருக்குச் சித்தமானதைச் செய்தால் அவனுக்குச் செவிகொடுப்பார். 32.பிறவிக்குருடனுடைய கண்களை ஒருவன் திறந்தானென்று உலகமுண்டானதுமுதல் கேள்விப்பட்டதில்லையே. 33.அவர் தேவனிடத்திலிருந்து வராதிருந்தால் ஒன்றும் செய்யமாட்டாரே என்றான். 34.அவர்கள் அவனுக்குப் பிரதியுத்தரமாக: முழுவதும் பாவத்தில் பிறந்த நீ எங்களுக்குப் போதிக்கிறாயோ என்று சொல்லி, அவனைப் புறம்பே தள்ளிவிட்டார்கள் - யோவான் 9:24-34

நீ அவரைக் கண்டிருக்கிறாய்

அந்த குருடனை, சீலோவாம் குளத்திற்கு அனுப்பின கர்த்தர், அங்கிருந்து மறைந்து போயிருந்தார், அவன் குளத்திலே தன் கண்களை கழுவி பார்வையடைந்தவனாய் திரும்பி வந்த பொழுது கர்த்தர் அங்கே இல்லை, கர்த்தர் ஏன் அங்கிருந்து மறைந்து போக வேண்டும்?

ஒருமுறை, இயேசு கிறிஸ்து, சமாரியா ஸ்திரீயை சந்தித்த பொழுது, அவள் ஊருக்குள்ளே போய், ஜனங்களை அழைத்து வரும் வரை காத்திருந்தார், இன்னொருமுறை குஷ்டரோகியான பத்து பேர் கர்த்தரை சந்தித்த பொழுது, அவர்களில் ஒருவன் திரும்பி வரும் வரை காத்திருந்தார், ஆனால் இங்கு அந்த பிறவிக்குருடன் பார்வையடைந்தவனாய்த் திரும்பி வந்த பொழுது கர்த்தர் அங்கில்லை, அதற்கு காரணம் என்ன?

இந்த சம்பவத்தை மேலோட்டமாக படிக்கும் பொழுது, கர்த்தர் உமிழ்நீரினால் சேறுண்டாக்கி  குருடனுடைய கண்களின்மேல் பூசினது தான் தெரியும், யாராவது எச்சிலை கண்களில் பூசுவர்களா என்கிற கேள்வியும் எழும்பும்? ஆனால் அதன் பின்பு அவனை சுத்திகரிப்பதற்காக கர்த்தரே சீலோவாம் குளமாக மாறியிருந்தது யாருக்கும் தெரியாது, அதனால் தான், அங்கிருந்து மறைந்து போயிருந்தார், இயேசுவே அந்த தண்ணீராக மாறி, அவனை சுத்திகரித்து, அவனுக்கு பார்வையும் கொடுத்தார், ஏனெனில் அவருக்குள் நாம் பிழைக்கிறோம், அசைகிறோம், இருக்கிறோம் - அப்போஸ்தலர் 17:28

பார்வையடைந்த அவன் இயேசுவை கண்டதில்லை, ஆனால் அவன் கண்கள், தன்னை சுத்திகரித்த சீலோவாம் குளத்தை கண்டிருந்தது, அவன் முதன் முதலாக கண்டது அந்த சீலோவாம் குளத்தை தான், அதனால் தான் கர்த்தர், அவனிடம் "நீ அவரைக் கண்டிருக்கிறாய்" என்று சொன்னார்  - 35.அவனை அவர்கள் புறம்பே தள்ளிவிட்டதை இயேசு கேள்விப்பட்டு, அவனைக் கண்டபோது: நீ தேவனுடைய குமாரனிடத்தில் விசுவாசமாயிருக்கிறாயா என்றார். 36.அதற்கு அவன்: ஆண்டவரே, அவரிடத்தில் நான் விசுவாசமாயிருக்கும் படிக்கு அவர் யார் என்றான். 37.இயேசு அவனை நோக்கி: நீ அவரைக் கண்டிருக்கிறாய், உன்னுடனே பேசுகிறவர் அவர்தான் என்றார். 38.உடனே அவன்: ஆண்டவரே, விசுவாசிக்கிறேன் என்று சொல்லி, அவரைப் பணிந்துகொண்டான் - யோவான் 9:35-38

நீங்கள் அவரை கண்டதில்லை

அதே சமயத்தில்,  எருசலேமில் அநேகர் தேவனுடைய தற்சுரூபமாகிய இயேசுவை தங்கள் சொந்த கண்களால் கண்டிருந்தார்கள் - 15.அவர் அதரிசனமான தேவனுடைய தற்சுரூபமும், சர்வ சிருஷ்டிக்கும் முந்தின பேறுமானவர் - கொலோசெயர் 1:15

அவர்களிடம் இயேசு எங்கே இருக்கிறார் என்று கேட்டால்,  தங்கள் கைகளை நீட்டி, அதோ அங்கே இருக்கிறாரே அவர் தான் என்று அடையாளம் காண்பிப்பார்கள், ஆனால், அவர்களுக்கு இயேசு கிறிஸ்துவின் இரத்தத்தினால் கிடைக்கும் பாவமன்னிப்பாகிய சுத்திகரிப்பு தேவையில்லை, அவர்கள் இருதயத்தில் இயேசுவுக்கு இடமில்லை, அப்படிப்பட்டவர்களை பார்த்து இயேசு கிறிஸ்து சொன்னது தான் - நீங்கள் ஒருக்காலும் அவர் சத்தத்தைக் கேட்டதுமில்லை, அவர் ரூபத்தைக் கண்டதுமில்லை - யோவான் 5:33-37

காணாதவர்கள் காணும்படியாகவும், காண்கிறவர்கள் குருடராகும்படியாகவும்

வேதாகமம் தேவகுமாரனை குறித்து சொல்லும் பொழுது, அவர் காணாதவர்கள் காணும்படியாகவும், காண்கிறவர்கள் குருடராகும்படியாகவும் இந்த உலகத்திற்கு வருவார் என்று சொல்லுகிறது - 39.அப்பொழுது இயேசு: காணாதவர்கள் காணும்படியாகவும், காண்கிறவர்கள் குருடராகும்படியாகவும் நியாயத்தீர்ப்புக்கு நான் இந்த உலகத்தில் வந்தேன் என்றார். 40.அவருடனேகூட இருந்த பரிசேயரில் சிலர் இவைகளைக் கேட்டபொழுது: நாங்களும் குருடரோ என்றார்கள். 41.இயேசு அவர்களை நோக்கி: நீங்கள் குருடராயிருந்தால் உங்களுக்குப் பாவமிராது; நீங்கள் காண்கிறோம் என்று சொல்லுகிறபடியினால் உங்கள் பாவம் நிலைநிற்கிறது என்றார் - யோவான் 9:39-41

எப்படியெனில், இயேசு கிறிஸ்து எளிமையானவர்களின் கண்களை திறந்து, இரட்சிப்பையும் பரலோக ராஜ்யத்தையும் அளிக்கிறார் - 3.தளர்ந்த கைகளைத் திடப்படுத்தி, தள்ளாடுகிற முழங்கால்களைப் பலப்படுத்துங்கள். 4.மனம் பதறுகிறவர்களைப் பார்த்து: நீங்கள் பயப்படாதிருங்கள், திடன்கொள்ளுங்கள்; இதோ, உங்கள் தேவன் நீதியைச் சரிக்கட்டவும், உங்கள் தேவன் பதிலளிக்கவும் வருவார்; அவர் வந்து உங்களை இரட்சிப்பார் என்று சொல்லுங்கள். 5.அப்பொழுது குருடரின் கண்கள் திறக்கப்பட்டு, செவிடரின் செவிகள் திறவுண்டுபோம். 6.அப்பொழுது முடவன் மானைப்போல் குதிப்பான்; ஊமையன் நாவும் கெம்பீரிக்கும்; வனாந்தரத்திலே தண்ணீர்களும், கடுவெளியிலே ஆறுகளும் பாய்ந்தோடும் - ஏசாயா 35:3-6

அதே சமயத்தில், அவர் பெருமைக்காரர்களின் கண்களை மூடிப்போடுகிறார் - 9.அப்பொழுது அவர்: நீ போய், இந்த ஜனங்களை நோக்கி, நீங்கள் காதாரக் கேட்டும் உணராமலும், கண்ணாரக்கண்டும் அறியாமலும் இருங்கள் என்று சொல். 10.இந்த ஜனங்கள் தங்கள் கண்களினால் காணாமலும், தங்கள் காதுகளினால் கேளாமலும், தங்கள் இருதயத்தினால் உணர்ந்து குணப்படாமலும், நான் அவர்களை ஆரோக்கியமாக்காமலுமிருக்க, நீ அவர்கள் இருதயத்தைக் கொழுத்ததாக்கி, அவர்கள் காதுகளை மந்தப்படுத்தி, அவர்கள் கண்களை மூடிப்போடு என்றார் - ஏசாயா 6:9-10

சீலோவாம் குளத்தை குறித்த தீர்க்கதரிசனம்  

யாக்கோபு தன்னுடைய தீர்க்கதரிசனத்தில் கூட, சமாதான கர்த்தரை ஷிலோ என்றும், யூதா கோத்திரத்தில் வெளிப்படுவார் என்றும் குறிப்பிட்டிருந்தார் - 9.யூதா பாலசிங்கம், நீ இரை கவர்ந்துகொண்டு ஏறிப்போனாய்; என் மகனே, சிங்கம்போலும் கிழச்சிங்கம்போலும் மடங்கிப் படுத்தான்; அவனை எழுப்புகிறவன் யார்? 10.சமாதான கர்த்தர்[Shiloh] வருமளவும் செங்கோல் யூதாவைவிட்டு நீங்குவதும் இல்லை, நியாயப்பிரமாணிக்கன் அவன் பாதங்களை விட்டு ஒழிவதும் இல்லை; ஜனங்கள் அவரிடத்தில் சேருவார்கள் - ஆதியாகமம் 49:9-10

இஸ்ரவேல் தேசத்தில், எருசலேம் தேவாலயத்தினருகே சீலோவாம் என்கிற ஒரு குளம் இருந்தது, எபிரேய மொழியில் ஷ-லோ  [שָׁלַח => shâ-lach => ஷாலாஹ்] என்று சொல்லப்படும் அதற்கு "அனுப்பினார்" என்பதே அர்த்தம், தோல்பொருள் ஆராய்ச்சியாளர்கள் அந்த குளத்தை  கண்டுபிடித்து, அது இருந்த இடத்தையும் உறுதி செய்து இருக்கிறார்கள், அது ஏசாயா தீர்க்கதரிசியின் காலத்தில், எசேக்கியா ராஜாவினால் கட்டப்பட்டது - எசேக்கியாவின் மற்ற வர்த்தமானங்களும், அவனுடைய எல்லா வல்லமையும், அவன் ஒரு குளத்தையும் சாலகத்தையும் உண்டாக்கினதினாலே தண்ணீரை நகரத்திற்குள்ளே வரப்பண்ணினதும், யூதாவுடைய ராஜாக்களின் நாளாகமப் புஸ்தகத்தில் அல்லவோ எழுதியிருக்கிறது - II இராஜாக்கள் 20:20

தாவீதின் நகரத்தில் இருந்த அந்த குளத்திற்கு, தண்ணீரை அனுப்பவும் எசேக்கியா ராஜா ஏற்பாடு செய்திருந்தார் -  இந்த எசேக்கியா கீயோன் என்னும் ஆற்றிலே அணைகட்டி, அதின் தண்ணீரை மேற்கேயிருந்து தாழத் தாவீதின் நகரத்திற்கு நேராகத் திருப்பினான்; எசேக்கியா செய்ததெல்லாம் வாய்த்தது - II நாளாகமம் 32:30 

இந்த எசேக்கியா ராஜாவின் காலத்தில் வாழ்ந்த ஏசாயா  தீர்க்கதரிசி, பிதாவாகிய தேவன் நம்மை இரட்சிக்க குமாரனை அனுப்புவார் என்பதை, அந்த குளத்தின் பெயரை கொண்டே தீர்க்கதரிசனம் உரைத்தார் - 1.கர்த்தராகிய தேவனுடைய ஆவியானவர் என்மேல் இருக்கிறார்; சிறுமைப்பட்டவர்களுக்குச் சுவிசேஷத்தை அறிவிக்கக் கர்த்தர் என்னை அபிஷேகம்பண்ணினார்; இருதயம் நொறுங்குண்டவர்களுக்குக் காயங்கட்டுதலையும், சிறைப்பட்டவர்களுக்கு விடுதலையையும், கட்டுண்டவர்களுக்குக் கட்டவிழ்த்தலையும் கூறவும், 2.கர்த்தருடைய அநுக்கிரக வருஷத்தையும், நம்முடைய தேவன் நீதியைச் சரிக்கட்டும் நாளையும் கூறவும், துயரப்பட்ட அனைவருக்கும் ஆறுதல் செய்யவும், 3.சீயோனிலே துயரப்பட்டவர்களைச் சீர்ப்படுத்தவும், அவர்களுக்குச் சாம்பலுக்குப் பதிலாகச் சிங்காரத்தையும், துயரத்துக்குப் பதிலாக ஆனந்த தைலத்தையும், ஒடுங்கின ஆவிக்குப் பதிலாகத் துதியின் உடையையும் கொடுக்கவும், அவர் என்னை அனுப்பினார்  [שָׁלַח => shâ-lach => ஷாலாஹ்] ; அவர்கள் கர்த்தர் தம்முடைய மகிமைக்கென்று நாட்டின நீதியின் விருட்சங்களென்னப்படுவார்கள் - ஏசாயா 61:1-3

இந்த ஏசாயாவின் தீர்க்கதரிசனத்தை தான் இயேசு கிறிஸ்து தன் ஊழியத்தின் துவக்கத்தில் தேவாலயத்தில் படித்து, தாம் தான் "தேவனால் அனுப்பப்பட்டவர்" என்பதை இந்த உலகத்திற்கு அறிவித்தார் - 16.தாம் வளர்ந்த ஊராகிய நாசரேத்துக்கு அவர் வந்து, தம்முடைய வழக்கத்தின்படியே ஓய்வுநாளில் ஜெபஆலயத்திலே பிரவேசித்து, வாசிக்க எழுந்து நின்றார். 17.அப்பொழுது ஏசாயா தீர்க்கதரிசியின் புஸ்தகம் அவரிடத்தில் கொடுக்கப்பட்டது. அவர் புஸ்தகத்தை விரித்தபோது: 18.கர்த்தருடைய ஆவியானவர் என்மேலிருக்கிறார்; தரித்திரருக்குச் சுவிசேஷத்தைப் பிரசங்கிக்கும்படி என்னை அபிஷேகம்பண்ணினார்; இருதயம் நருங்குண்டவர்களைக் குணமாக்கவும், சிறைப்பட்டவர்களுக்கு விடுதலையையும், குருடருக்குப் பார்வையையும் பிரசித்தப்படுத்தவும், நொறுங்குண்டவர்களை விடுதலையாக்கவும், 19.கர்த்தருடைய அநுக்கிரக வருஷத்தைப் பிரசித்தப்படுத்தவும், என்னை அனுப்பினார் [שָׁלַח => shâ-lach => ஷாலாஹ்], என்று எழுதியிருக்கிற இடத்தை அவர் கண்டு, 20.வாசித்து, புஸ்தகத்தைச் சுருட்டி, பணிவிடைக்காரனிடத்தில் கொடுத்து, உட்கார்ந்தார். ஜெபஆலயத்திலுள்ள எல்லாருடைய கண்களும் அவர்மேல் நோக்கமாயிருந்தது. 21.அப்பொழுது அவர் அவர்களோடே பேசத்தொடங்கி: உங்கள் காதுகள் கேட்க இந்த வேதவாக்கியம் இன்றையத்தினம் நிறைவேறிற்று என்றார் - லூக்கா 4:16-21

அடுத்த பாகம்: இதோ, நீ சொஸ்தமானாய்