முந்தைய பாகம்: நீ போய், ஆசாரியனுக்கு உன்னைக் காண்பி
எகிப்து தேசத்தில், அடிமைகளாய் இருந்த இஸ்ரவேல் மக்கள், தங்களுக்குள் பேசிக் கொண்டிருந்த ஒரு காரியம், "வனாந்தரத்தில் மூன்று நாள் பிரயாணத்தூரம் சென்று ஒரு விசேஷித்த பலியை செலுத்த வேண்டும்" என்பதாகும், ஏனென்றால், அது தேவனே அவர்களுக்கு இட்ட கட்டளையாய் இருந்தது - 16.நீ போய், இஸ்ரவேலின் மூப்பரைக்கூட்டி, அவர்களிடத்தில்: ஆபிரகாம் ஈசாக்கு யாக்கோபு என்பவர்களுடைய தேவனாயிருக்கிற உங்கள் பிதாக்களுடைய தேவனாகிய கர்த்தர் எனக்குத் தரிசனமாகி, உங்களை நிச்சயமாய்ச் சந்தித்து, எகிப்தில் உங்களுக்குச் செய்யப்பட்டதைக் கண்டேன் என்றும், 17.நான் உங்களை எகிப்தின் சிறுமையிலிருந்து நீக்கி, பாலும் தேனும் ஓடுகிற தேசமாகிய கானானியர் ஏத்தியர் எமோரியர் பெரிசியர் ஏவியர் எபூசியருடைய தேசத்துக்குக் கொண்டுபோவேன் என்றும் சொன்னேன் என்றார் என்று சொல்லு. 18.அவர்கள் உன் வாக்குக்குச் செவிகொடுப்பார்கள்; அப்பொழுது நீயும் இஸ்ரவேலின் மூப்பரும் எகிப்தின் ராஜாவினிடத்தில் போய்: எபிரெயருடைய தேவனாகிய கர்த்தர் எங்களைச் சந்தித்தார்; இப்பொழுதும் நாங்கள் வனாந்தரத்தில் மூன்று நாள் பிரயாணம்போய், எங்கள் தேவனாகிய கர்த்தருக்குப் பலியிடும்படி எங்களைப் போகவிடவேண்டுமென்று சொல்லுங்கள் - யாத்திராகமம் 3:16-18
இந்த பலியிட வேண்டிய காரணத்தை சொல்லி தான், மோசேயும் ஆரோனும் பார்வோனிடம், எகிப்தை விட்டு போக அனுமதி கேட்டார்கள், ஆனால் பார்வோன் அதற்கு சம்மதிக்கவில்லை, ஏனென்றால், பார்வோன் இந்த பலியானது, மக்கள் அடிமை தனத்திலிருந்து பெரும் விடுதலை என்பதையும், அதனால் இவர்கள் எகிப்துக்கு திரும்பி வர மாட்டார்கள் என்பதையும் அறிந்திருந்தான் - 1.பின்பு, மோசேயும் ஆரோனும் பார்வோனிடத்தில் போய்: இஸ்ரவேலின் தேவனாகிய கர்த்தர் வனாந்தரத்திலே எனக்குப் பண்டிகை கொண்டாடும்படி என் ஜனங்களைப் போகவிடவேண்டும் என்று சொல்லுகிறார் என்றார்கள். 2.அதற்குப் பார்வோன்: நான் இஸ்ரவேலைப் போகவிடக் கர்த்தரின் வார்த்தையைக் கேட்கிறதற்கு அவர் யார்? நான் கர்த்தரை அறியேன்; நான் இஸ்ரவேலைப் போகவிடுவதில்லை என்றான். 3.அப்பொழுது அவர்கள்: எபிரெயருடைய தேவன் எங்களைச் சந்தித்தார்; நாங்கள் வனாந்தரத்தில் மூன்றுநாள் பிரயாணம்போய், எங்கள் தேவனாகிய கர்த்தருக்குப் பலியிடும்படி போகவிடவேண்டும்; போகாதிருந்தால், அவர் கொள்ளைநோயும் பட்டயமும் எங்கள் மேல் வரப்பண்ணுவார் என்றார்கள் - யாத்திராகமம் 5:1-3
இப்படி, பார்வோன் இஸ்ரவேல் மக்களை போகவிட மாட்டேன் என்று சொல்லும் பொழுதெல்லாம், கர்த்தர் எகிப்தை கொள்ளை நோயினாலும் கல் மழையினாலும் வாதிக்க, கடைசியாக பார்வோன் இஸ்ரவேல் மக்களை எகிப்தை விட்டு போக அனுமதித்தான் - 40.இஸ்ரவேல் புத்திரர் எகிப்திலே குடியிருந்த காலம் நானூற்றுமுப்பது வருஷம். 41.நானூற்றுமுப்பது வருஷம் முடிந்த அன்றைத்தினமே கர்த்தருடைய சேனைகள் எல்லாம் எகிப்துதேசத்திலிருந்து புறப்பட்டது. 42.கர்த்தர் அவர்களை எகிப்துதேசத்திலிருந்து புறப்படப்பண்ணினதினால், இது அவருக்கென்று முக்கியமாய் ஆசரிக்கத்தக்க ராத்திரியாயிற்று; இஸ்ரவேல் சந்ததியார் எல்லாரும் தங்கள் தலைமுறைதோறும் கர்த்தருக்கு முக்கியமாய் ஆசரிக்கவேண்டிய ராத்திரி இதுவே - யாத்திராகமம் 12:40-42
இஸ்ரவேல் மக்கள் தாங்கள் எகிப்து தேசத்துக்கு வந்து நானூற்றுமுப்பது வருடங்கள் நிறைவேறின, அந்த நாளில் தானே, எகிப்தை விட்டு கிளம்பினார்கள், அதற்கு நானூற்றுமுப்பது வருடங்களுக்கு முன்பு, அதே நாளில் தானே, யோசேப்பு முதல் ஆளாக எகிப்துக்கு கொண்டு வரப்பட்டான்.
இப்பொழுது அந்த நாள், இஸ்ரவேல் மக்களுக்கு ஒரு விடுதலையின் நாளாக, ஒரு பஸ்கா பண்டிகையின் நாளாக, ஒரு மனமகிழ்ச்சியின் நாளாக மாறிவிட்டது, ஆனால், அந்த நாள், யாக்கோபு தன் மகனுக்காக கண்ணீர் விட்ட நாள், யாக்கோபிடம் அவனுடைய நேச குமாரனாகிய யோசேப்பின் மரணம் அறிவிக்கப்பட்ட நாள், இப்படியாக அந்த பஸ்கா பண்டிகையானது, மனமகிழ்ச்சியின் நாளாகவும், அதே சமயத்தில் குமாரனுக்காக கண்ணீர் விடும் நாளாகவும் இருந்தது, அந்த குமாரன் தேவகுமாரனாகிய இயேசு கிறிஸ்துவே.
இஸ்ரவேல் மக்கள், பார்வோனை சந்திக்கும் போதெல்லாம், எங்களுக்கு இந்த அடிமைத்தனத்திலிருந்து விடுதலை வேண்டும் என்று கேட்காமல், நாங்கள் வனாந்தரத்தில் மூன்று நாள் பயணம் செய்து பலி செலுத்த வேண்டும் என்று சொன்னவர்கள், மூன்றாம் நாள் தாங்கள் செலுத்த வேண்டிய பலியை மறந்து விட்டார்கள், விடுதலைப் பெற்ற மூன்றாம் நாள், அந்த கொடிய வனாந்திரத்தில், தண்ணீர் இல்லாமல் கஷ்டப்பட்ட அவர்களுக்கு, மூன்றாம் நாள் செலுத்த வேண்டிய பலியை குறித்து நினைக்கவும் வாய்ப்பில்லாமல் போய்விட்டது - 22.பின்பு மோசே இஸ்ரவேல் ஜனங்களைச் சிவந்த சமுத்திரத்திலிருந்து பிரயாணப்படுத்தினான். அவர்கள் சூர் வனாந்தரத்துக்குப் புறப்பட்டுப்போய், மூன்று நாள் வனாந்தரத்தில் தண்ணீர் கிடையாமல் நடந்தார்கள். 23.அவர்கள் மாராவிலே வந்தபோது, மாராவின் தண்ணீர் கசப்பாயிருந்ததினால் அதைக் குடிக்க அவர்களுக்குக் கூடாதிருந்தது; அதினால் அவ்விடத்துக்கு மாரா என்று பேரிடப்பட்டது. 24.அப்பொழுது ஜனங்கள் மோசேக்கு விரோதமாய் முறுமுறுத்து: என்னத்தைக் குடிப்போம் என்றார்கள். 25.மோசே கர்த்தரை நோக்கிக் கூப்பிட்டான்; அப்பொழுது கர்த்தர் மோசேக்கு ஒரு மரத்தைக் காண்பித்தார்; அதை அவன் தண்ணீரில் போட்டவுடனே, அது மதுரமான தண்ணீராயிற்று. அவர் அங்கே அவர்களுக்கு ஒரு நியமத்தையும் ஒரு நியாயத்தையும் கட்டளையிட்டு, அங்கே அவர்களைச் சோதித்து: 26.நீ உன் தேவனாகிய கர்த்தரின் சத்தத்தைக் கவனமாய்க் கேட்டு, அவர் பார்வைக்குச் செம்மையானவைகளைச் செய்து, அவர் கட்டளைகளுக்குச் செவிகொடுத்து, அவருடைய நியமங்கள் யாவையும் கைக்கொண்டால், நான் எகிப்தியருக்கு வரப்பண்ணின வியாதிகளில் ஒன்றையும் உனக்கு வரப்பண்ணேன்; நானே உன் பரிகாரியாகிய கர்த்தர் என்றார் - யாத்திராகமம் 15:22-26
எகிப்தை விட்டு கிளம்புமுன், ஒவ்வொரு முறை பார்வோனை சந்திக்கும் பொழுதெல்லாம், நாங்கள் வனாந்தரத்தில் மூன்று நாள் பயணம் செய்து பலியை செலுத்த வேண்டும் என்று சொன்ன மோசேயும் ஆரோனும், எகிப்தை விட்டு கிளம்பின பின்பு அந்த பலியை குறித்து ஒரு வார்த்தை கூட பேசவில்லை, அதற்கு பின் வந்த தீர்க்கதரிசிகளும் கூட மூன்றாம் நாள் செலுத்தப்பட வேண்டிய பலியை ஏன் இஸ்ரவேல் மக்கள் செலுத்தவில்லை என்று கேட்கவில்லை, ஏனென்றால், தேவன் சொன்ன மூன்று நாளின் உள்ளான அர்த்ததை அநேகர் அறியாமல் தான் இருந்தார்கள்.
அப்படிப்பட்ட சூழ்நிலையில் தான், அன்று முற்செடியில் தரிசனமானவரே, மனு உருவெடுத்து இயேசு கிறிஸ்துவாக இந்த பூமிக்கு வந்து, யூதேயாவின் வனாந்தரத்தில், மூன்று நாள் முடிந்துவிட்டது, தான் சிலுவையில் பலியாகும் காலம் வந்துவிட்டது என்பதை அறிவித்தார் - 1.அந்த நாட்களிலே திரளான ஜனங்கள் கூடிவந்திருக்கையில், அவர்கள் சாப்பிடுகிறதற்கு ஒன்றுமில்லாதபோது, இயேசு தம்முடைய சீஷரை அழைத்து: 2.ஜனங்களுக்காகப் பரிதபிக்கிறேன், ஏனெனில், அவர்கள் ஏற்கனவே மூன்று நாட்களாக என்னுடன் இருக்கிறார்கள், அவர்களுக்குச் சாப்பிட எதுவும் இல்லை. 3.இவர்களில் சிலர் தூரத்திலிருந்து வந்தவர்களாகையால், நான் இவர்களைப் பட்டினியாய் வீட்டிற்கு அனுப்பிவிட்டால் வழியில் சோர்ந்துபோவார்களே என்றார் - மாற்கு 8:1-3
அது மாத்திரம் இல்லாமல், பரிசேயரையும் சதுசேயரையும் பார்த்து, காலங்களின் அடையாளங்களை நிதானிக்க உங்களால் கூடாதா? என்றும் கேட்டார் - 1.பரிசேயரும் சதுசேயரும் அவரைச் சோதிக்கும்படி அவரிடத்தில் வந்து: வானத்திலிருந்து ஓர் அடையாளத்தைத் தங்களுக்குக் காண்பிக்கவேண்டும் என்று கேட்டார்கள். 2.அவர்களுக்கு அவர் பிரதியுத்தரமாக: அஸ்தமனமாகிறபோது, செவ்வானமிட்டிருக்கிறது, அதினால் வெளிவாங்கும் என்று சொல்லுகிறீர்கள். 3.உதயமாகிறபோது, செவ்வானமும் மந்தாரமுமாயிருக்கிறது, அதினால் இன்றைக்குக் காற்றும் மழையும் உண்டாகும் என்று சொல்லுகிறீர்கள். மாயக்காரரே, வானத்தின் தோற்றத்தை நிதானிக்க உங்களுக்குத் தெரியுமே, காலங்களின் அடையாளங்களை நிதானிக்க உங்களால் கூடாதா? - மத்தேயு 16:1-3
ஏனென்றால், 1258 BC என்கிற கால கட்டத்தில், இஸ்ரவேல் மக்கள் எகிப்திலிருந்து புறப்பட்ட பொழுது, அவர்கள் மேற்கொள்ள வேண்டிய மூன்று நாள் பயணத்தில், ஒரு நாள் என்பது 430 வருடங்கள் என்பதை தேவ ஆவியானவர் ரகசியமாக அறிவித்திருந்தார், அதனால் தான் சரியாக 1290 வருடங்கள் கழித்து, 33 AD இயேசு கிறிஸ்து சிலுவையில் அறையப்பட்டார்.
எப்படியெனில், இஸ்ரவேல் புத்திரர் எகிப்திலே குடியிருந்த காலம் 430 வருஷம், 430 வருஷம் முடிந்த அன்றைத்தினமே கர்த்தருடைய சேனைகள் எல்லாம் எகிப்துதேசத்திலிருந்து புறப்பட்டது [At the end of 430 years, on that same day, all the LORD’s divisions went out from the land of Egypt], அதாவது, 430 வருடமாகிய அந்த நாளில் தானே என்று சொல்லும்பொழுது, ஒரு நாள் என்பது 430 வருடம் என்பதையும், ஆக மொத்தம் 3 X 430 = 1290 வருடங்கள் கழித்து கிறிஸ்துவின் சிலுவை மரணம் இருக்கும் என்பதையும் அறிவித்தார், அதனால் தான் கர்த்தர், தான் சிலுவைக்கு போகும் முன்பு, பரிசேயர் மற்றும் சதுசேயரிடம் காலங்களின் அடையாளங்களை நிதானிக்க உங்களால் கூடாதா? என்று வினவினார்.
அடுத்த பாகம்: நான் உங்களுக்குச் சொல்லுகிறேன்