நீ இஸ்ரவேலில் போதகனாயிருந்தும்?

ரகசியம் புரிந்த நிக்கொதேமு, தேவனுக்குரிய வெள்ளைப்போளம் கரியபோளம் கலவையை கொண்டுவந்தான்

முந்தைய பாகம்: நான் உங்களுக்குச் சொல்லுகிறேன்

தேவன், தன்னுடைய ஒரே பேரான குமாரனை, பழைய ஏற்பாட்டில் சொல்லப்பட்ட தீர்க்கதரிசனங்களை நிறைவேற்ற அனுப்பின போது, அதிகாரத்தில் இருந்த பிரதான ஆசாரியரும், வேதபாரகரும், இயேசு கிறிஸ்துவை, பழைய ஏற்பாட்டை அழிக்க வந்தவர் என்று சொல்லி சிலுவையில் அறைந்து கொலை செய்ததை கடந்த தொகுப்பில் பார்த்தோம். 

ஆனால், அந்த வேதபாரகர் கூட்டத்தில் ஒருவராய் இருந்த நிக்கொதேமு, இயேசு கிறிஸ்துவை தேவனுடைய குமாரன் என்று விசுவாசித்து, பழைய ஏற்பாட்டில் சொல்லப்பட்ட ஒரு காரியத்தை அழகாக நிறைவேற்றினார். 

துவக்கத்தில், தன்னோடிருக்கும் அனைவரும் இயேசுவை கொலை செய்ய பார்க்கிறார்கள் என்பதை அறிந்த நிக்கொதேமு,  இயேசுவை சந்திக்க ஒரு இராக்காலத்திலே வந்தார், அப்பொழுது இயேசு கிறிஸ்து தன்னுடைய மரணத்தையும் , தன்னுடைய மரணத்தினால் தான் மனுக்குலத்திற்கு இரட்சிப்பு என்பதையும் வெளிப்படையாக நிக்கொதேமுவிடம் சொன்னார் - 10.இயேசு அவனை நோக்கி: நீ இஸ்ரவேலில் போதகனாயிருந்தும் இவைகளை அறியாமலிருக்கிறாயா?. 11.மெய்யாகவே மெய்யாகவே நான் உனக்குச் சொல்லுகிறேன், நாங்கள் அறிந்திருக்கிறதைச் சொல்லி, நாங்கள் கண்டதைக்குறித்துச் சாட்சிகொடுக்கிறோம்; நீங்களோ எங்கள் சாட்சியை ஏற்றுகொள்ளுவதில்லை. 12.பூமிக்கடுத்த காரியங்களை நான் உங்களுக்குச் சொல்லியும் நீங்கள் விசுவாசிக்கவில்லையே, பரமகாரியங்களை உங்களுக்குச் சொல்வேனானால் எப்படி விசுவாசிப்பீர்கள்? 13.பரலோகத்திலிருந்திறங்கினவரும் பரலோகத்திலிருக்கிறவருமான மனுஷகுமாரனேயல்லாமல் பரலோகத்துக்கு ஏறினவன் ஒருவனுமில்லை. 14.சர்ப்பமானது மோசேயினால் வனாந்தரத்திலே உயர்த்தப்பட்டதுபோல மனுஷகுமாரனும், 15.தன்னை விசுவாசிக்கிறவன் எவனோ அவன் கெட்டுப்போகாமல் நித்தியஜீவனை அடையும்படிக்கு, உயர்த்தப்படவேண்டும். 16.தேவன், தம்முடைய ஒரேபேறான குமாரனை விசுவாசிக்கிறவன் எவனோ அவன் கெட்டுப்போகாமல் நித்தியஜீவனை அடையும்படிக்கு, அவரைத் தந்தருளி, இவ்வளவாய் உலகத்தில் அன்புகூர்ந்தார் - யோவான் 3:10-16

பின்பு ஒருமுறை, பிரதான ஆசாரியரும் பரிசேயரும் இயேசுவை கைது செய்ய முயற்சி செய்த பொழுது, அன்று உலகத்தாருக்கு பயந்தவனாயிருந்த நிக்கொதேமு, வெளிப்படையாக இயேசுவுக்காக பரிந்து பேசினார் - 45.பின்பு அந்தச் சேவகர் பிரதான ஆசாரியரிடத்திற்கும் பரிசேயரிடத்திற்கும் திரும்பிவந்தார்கள்; இவர்கள் அவர்களை நோக்கி: நீங்கள் அவனை ஏன் கொண்டுவரவில்லை என்று கேட்டார்கள். 46.சேவகர் பிரதியுத்தரமாக: அந்த மனுஷன் பேசுகிறதுபோல ஒருவனும் ஒருக்காலும் பேசினதில்லை என்றார்கள். 47.அப்பொழுது பரிசேயர்: நீங்களும் வஞ்சிக்கப்பட்டீர்களா? 48.அதிகாரிகளிலாவது பரிசேயரிலாவது யாதாமொருவர் அவனை விசுவாசித்ததுண்டா? 49.வேதத்தை அறியாதவர்களாகிய இந்த ஜனங்கள் சபிக்கப்பட்டவர்கள் என்றார்கள். 50.இராத்திரியிலே அவரிடத்திற்கு வந்தவனும் அவர்களிலொருவனுமாகிய நிக்கொதேமு என்பவன் அவர்களை நோக்கி: 51.ஒரு மனுஷன் சொல்வதைக் கேட்டு, அவன் செய்கைகளை அறிகிறதற்கு முன்னே, அவனை ஆக்கினைக்குட்படுத்தலாமென்று நம்முடைய நியாயப்பிரமாணம் சொல்லுகிறதா என்றான். 52.அதற்கு அவர்கள்: நீரும் கலிலேயனோ? கலிலேயாவிலிருந்து ஒரு தீர்க்கதரிசியும் எழும்புகிறதில்லை என்பதை ஆராய்ந்துபாரும் என்றார்கள். 53.பின்பு அவரவர் தங்கள் தங்கள் வீட்டுக்குப் போனார்கள் - யோவான் 7:45-53

இப்படி, இயேசு கிறிஸ்துவின் மேல் அன்பு வைத்திருந்த நிக்கொதேமுவுக்கு, ஒரு நாள் இயேசு கிறிஸ்து சிலுவையில்  அறையப்பட்ட செய்தி வந்தது, அது அவருக்கு தாங்க முடியாத துக்கத்தை கொடுத்தது, அது பஸ்கா பண்டிகையின் ஆயத்த நாளாக இருந்தது, அப்பொழுது தான் இயேசு "நீ இஸ்ரவேலில் போதகனாயிருந்தும் இவைகளை அறியாமலிருக்கிறாயா?" என்று கேட்ட கேள்வியின் அர்த்தமும் புரிந்தது.

நிக்கொதேமு, பஸ்காவின் ஆயத்த நாளாகிய இன்று இரவே, கர்த்தர் தன் ஜீவனை விட வேண்டும் என்பதை அறிந்து கொண்டார், தேவனுக்கென்று சொல்லப்பட்ட பரிசுத்த அபிஷேக தைல பொருட்களுடன் கல்வாரியை நோக்கி நடக்க ஆரம்பித்தார் - 22.பின்னும் கர்த்தர் மோசேயை நோக்கி: 23.மேன்மையான சுகந்தவர்க்கங்களாகிய சுத்தமான வெள்ளைப்போளத்தில் பரிசுத்த ஸ்தலத்தின் சேக்கலின்படி ஐந்நூறு சேக்கல் இடையையும், சுகந்த கருவாப்பட்டையிலே அதில் பாதியாகிய இருநூற்று ஐம்பது சேக்கல் இடையையும், சுகந்த வசம்பில் இருநூற்று ஐம்பது சேக்கல் இடையையும், 24.இலவங்கப்பட்டையில் ஐந்நூறு சேக்கல் இடையையும், ஒலிவ எண்ணெயில் ஒரு குடம் எண்ணெயையும் எடுத்து, 25.அதனால், பரிமள தைலக்காரன் செய்வதுபோல, கூட்டப்பட்ட பரிமளதைலமாகிய சுத்தமான அபிஷேக தைலத்தை உண்டுபண்ணுவாயாக; அது பரிசுத்த அபிஷேக தைலமாயிருக்கக்கடவது. 26.அதினாலே ஆசரிப்புக் கூடாரத்தையும், சாட்சிப்பெட்டியையும், 27.மேஜையையும், அதின் பணிமுட்டுகள் எல்லாவற்றையும், குத்துவிளக்கையும், அதின் கருவிகளையும், தூபபீடத்தையும், 28.தகன பலிபீடத்தையும், அதின் பணிமுட்டுகள் எல்லாவற்றையும், தொட்டியையும், அதின் பாதத்தையும் அபிஷேகம்பண்ணி, 29.அவைகள் மகா பரிசுத்தமாயிருக்கும்படிக்கு, அவைகளைப் பரிசுத்தப்படுத்துவாயாக; அவைகளைத் தொடுகிறதெல்லாம் பரிசுத்தமாயிருக்கும். 30.ஆரோனும் அவன் குமாரரும் எனக்கு ஆசாரிய ஊழியம் செய்யும்படிக்கு, நீ அவர்களை அபிஷேகம்பண்ணி, அவர்களைப் பரிசுத்தப்படுத்துவாயாக. 31.இஸ்ரவேல் புத்திரரோடே நீ பேசிச் சொல்லவேண்டியதாவது: உங்கள் தலைமுறைதோறும் இது எனக்குரிய பரிசுத்த அபிஷேக தைலமாயிருக்கவேண்டும் -  யாத்திராகமம் 30:22-31

ஆனால் பரிசுத்த அபிஷேக தைலத்தை குறித்த கட்டளை என்னவென்றால், ஒருவன் அதை மனிதனுடைய சரீரத்தின்மேல் வார்த்தால், வார்த்தவன் நரகாக்கினைக்கு பாத்திரனாகி விடுவான், அதாவது ஒருவேளை இயேசு சாதாரண மனிதராக இருந்தால், நிக்கொதேமு நரகத்திற்கு தான் போக வேண்டும், அதனால் தான் நிக்கொதேமுவின் வீட்டில் எவ்வளவு எதிர்ப்புகள், அவருடைய மனைவியும் பிள்ளைகளும் ஒருவேளை இயேசு சாதாரண மனிதனாக இருந்தால், அது நம் குடும்பத்திற்கே சாபமாய் முடிந்துவிடும் என்று அவனை தடுத்தார்கள் - 32.இது மனிதருடைய சரீரத்தின்மேல் வார்க்கப்படலாகாது; இது செய்யப்பட்ட முறையின்படி அவர்கள் வேறொரு தைலத்தைச் செய்யவுங் கூடாது; இது பரிசுத்தமானது, இது உங்களுக்குப் பரிசுத்தமாயிருப்பதாக. 33.இந்த முறையின்படியே தைலங்கூட்டுகிறவனும், அதில் எடுத்து அந்நியன்மேல் வார்க்கிறவனும், தன் ஜனத்தில் இராதபடிக்கு அறுப்புண்டுபோகக்கடவன் என்று சொல் என்றார் -  யாத்திராகமம் 30:32-33

ஆனால், எதுவும் நிக்கொதேமுவின் விசுவாசத்தை சீர்குலைக்க முடியவில்லை, அவர் நான் இந்த பரிசுத்த அபிஷேக தைலத்தை மனிதருடைய சரீரத்தின்மேல் அல்ல, தேவனுடைய சரீரத்தின்மேல் வார்க்க போகிறேன் என்று சொல்லி, அவைகளை இயேசுவின் சரீரத்தின்மேல் வார்த்து, சரீரத்தை சீலைகளில் சுற்றிக் கல்லறையில் வைத்தார் - 38.இவைகளுக்குப்பின்பு அரிமத்தியா ஊரானும், யூதருக்குப் பயந்ததினால் இயேசுவுக்கு அந்தரங்க சீஷனுமாகிய யோசேப்பு இயேசுவின் சரீரத்தை எடுத்துக்கொண்டுபோகும்படி பிலாத்துவினிடத்தில் உத்தரவு கேட்டான்; பிலாத்து உத்தரவு கொடுத்தான். ஆகையால் அவன் வந்து, இயேசுவின் சரீரத்தை எடுத்துக்கொண்டுபோனான். 39.ஆரம்பத்திலே ஒரு இராத்திரியில் இயேசுவினிடத்தில் வந்திருந்த நிக்கொதேமு என்பவன் வெள்ளைப்போளமும் கரியபோளமும் கலந்து ஏறக்குறைய நூறு இராத்தல் கொண்டுவந்தான். 40.அவர்கள் இயேசுவின் சரீரத்தை எடுத்து, யூதர்கள் அடக்கம்பண்ணும் முறைமையின்படியே அதைச் சுகந்தவர்க்கங்களுடனே சீலைகளில் சுற்றிக் கட்டினார்கள். 41.அவர் சிலுவையில் அறையப்பட்ட இடத்தில் ஒரு தோட்டமும், அந்தத் தோட்டத்தில் ஒருக்காலும் ஒருவனும் வைக்கப்பட்டிராத ஒரு புதிய கல்லறையும் இருந்தது. 42.யூதருடைய ஆயத்தநாளானபடியினாலும், அந்தக் கல்லறை சமீபமாயிருந்தபடியினாலும், அவ்விடத்திலே இயேசுவை வைத்தார்கள் - யோவான் 19:38-42

முதல் பாகம்: என்னைத் தொடாதே